Нылпи дунне

 Эва  Яниковски

Монэн мар ке со но луэ

(книгаысь люкетъёс)

Нырысетӥ нуналаз ик школае ветлоно кулэ вылымтэ, мыноно гинэ. Ма мон огнам но быгатысал, озьы ке но, ваньзы ик  сьӧрам лыктӥзы, монэ келяса. Школа азбарын мынам самой умой интые вал, нырысетӥ чурын ик пуки, ма со понна билет но басьтоно ӧз лу. Нырысетӥ чурын пукыса, ваньзэ адӟыны луэ вылэм: кырӟамзэс но, вераськемзэс но, ма школа кивалтӥсьлэсь вераськемзэ но.

Одӥг-ог гинэ мышлань берытсконо луи, бадӟым пиналъёслэсь вераськемзэс кылон понна.

Нош адӟе вал, макем школаен кивалтӥсь шумпотӥз милемлы, нырысетӥ классэ лыктӥсьёслы, паймод но бырод, ява, собере ватсаз на, берло, пе, тӥ но тодон-валан изкарез вормыса басьтоды ай.

Эх, малы меда та кивалтӥсь агай азьло верамтэ, сокем милемды возьма шуыса, угось гужем мынам сомында дыры вал, та школаязы мон азьлогес ик лыктысал ай. 

Кивалтӥсь агай шоры туж сак учкыса но, мон ӧй адӟы, ку дышетскон ар усьтӥськиз. Нош со вераз вал, тани али дышетскон арез усьтӥсько шуыса.

Шулдыръяськон бере та нуналэ ик милемлы трос карандаш но пӧртэм буёло кагаз кузьмазы, а со борды нош эшшо ке дышетӥсь апай шедиз на. Тани мар со ивортӥз: мон, пе, кыкетӥ анайды луо.

Мон кышкатски, ма тае кылыса анае чик но уз шумпоты, уго табере кык кузя луозы ни. Нош анае шӧдтэк шорысь пальпотӥз, огнам, пе, сёровно тон сьӧры эскериськыны уг вуттӥськы.

****

Дорамы кин ке куное лыктэ ке, соку анае кофе позьтэ, висъетмылэсь ӧссэ ворса, угось умойгес луоз, отчы ӧд ке учкы.

Но жаляса верано, дышетӥсе анаелы азьлогес поттылэм ни вылэм, со шоры, пе, куно шоры кадь эн учке, мон, пе, семьяеныды гинэ тодматско.

Соин ик анае вань ӧсъёсты миськиз, вань вылдӥсьмес но пыдкутчанмес пыроназе лад-лад тыриз. Атае нош креслолэсь куксэ лякыны дыр но шедьтӥз, люстрае кык лампочка но понӥз.

Бори агае борддоръёсысь вань постеръёссэ октӥз, мон со куспын бичам каштанъёсме балконэ поттӥ. Кыӵе нош чалмыт-шыпыт луиз улонниямы, ноку таӵеез адӟем но кылэм но ӧй вал на! Тини соку Пачитачи пунымес но бускельёсмы доры поттӥмы, угось со уг на тоды, дышетӥсе куно ӧвӧл, соин ик, кутскоз но пыдкутчанзэ но йыръёз я мар, кызьы мукет куноосмылэсь каре.

Дышетӥсе ӝыны час гинэ пукиз дорамы, озьы ке но семьяенымы пыр-поч тодматскыны удалтӥз: угось со куспын Эрдысь Банди агай семьяеныз вуиз, уламы улӥсьёс черекъяны кутскизы, балконысьтыды, пе, вань каштанъёсты ми доры усьыло-погыльско, бускельёсмы нош пунымес берлань дорамы ваизы, угось мискинь ӧз тод, мурт сиськонниын чылкыт луыны кулэ шуыса.

Мон чик но ӧй куректы та пумысен, ӵок, дышетӥсе табере адӟиз, ми туж шулдыр улӥськом дорын шуыса.

*****

Мон вордӥськем нуналам гинэ будӥсько, угось ӵапак соку атае монэ мерта. Туэ нош рекорд пуктӥ: пыдкутчан сяна, штаниос но кузьгес басьтоно луиз. Ма сыӵе ик кузь кулэ но ӧй вал, кыӵе магазинын кадь.

Апай нош, кудӥз вузаськонниын ужа, индылӥз: ма ӵок, пе, сёровно джинс штани миськыку пуксе, пияшъёс нош сыӵе ӝог будо, кин ке соосты нюлтыса возе кадь. Тинь озьы ӝоген, пе, штаниеныд эшъяськод ай.

Вордиськем нуналам ӵужае туп кузьмаз, кудиныз урамын гинэ луэ шудыны, агаелэсь нош майталву-пеллян шедиз ай та, таиныз но балконын гинэ, пе, луэ пелляны, Банди агае нош ымын шудон гармоника кузьмаз, кудӥныз корка пушкын гинэ, пе, шудоно. Мон ваньзэ тае нырысь-валысь ӧй тод, бускель апай куаретэмысь гинэ валай: балконын крезьгурамдэ ноку но, пе, медам кыл ни.

Гармоникаеным дышетскыны кутскыса, анайёсы монэ весяк ураме тупен шудыны улляло, яке куарето, малы, пе, Аттила эшед доры уд ветлӥськы, сыӵе матын улыса но. Мон шумпотыса урамын шудысал, Аттила доры но мынысал, нош гуртын дыръям ялан гармоникаеным шудӥсько. Кылӥ вал уго, кызьы ке но ӝыт атае анаелы шуиз, эн алы, пе, мед шудоз, ӝоген акыльтоз ай солы. Мынам нош уг поты адӟеме, кызьы анай-атае нош ик йырзэс сэзьяса лулӟыло но шуо, токма гинэ, пие, та гармоника кузьымед, таиныз но чиданэд уг тырмы шудыны.

****

Бори агае огпол математикаен «куинь» бысьтыса вуиз гуртэ. Ма озьы ини со, шуэ, дорын инты ӧвӧл, уг лу татын лач-лач дышетскыны.

Мон но соглаш, ми дорын чик но инты ӧвӧл, уг лу пыр-поч дышетскыны. Ма басьтысал-а мон но «куинь» гожъяськонэн?

Талы пумит атае тани мар вазиз: интылы луыса гинэ ке, пе, «куинь» ворттӥськоды гуртэ, тань юрттоз со милемлы, висъетысьтымы вань кулэтэм арбериосмес куялоз, соку тӥни интымы но луоз, «куинь» но уз ву ни.

Мон нош атае пумит вази, нырысь ик, пӧй, Борилэсь со вань постеръёссэ куштом. Бори нош пумитам, ма кызьы, пе, сотэк! Нош азьло тынэсьтыд, пе, каштанъёстэ но спичка коробкаостэ сэрпалляно.

Анае нош атаелы шуиз, шудон машинаос но, пе, токма гинэ кыллё ни, бирдыфутбол но туж трос инты басьтэ.

Атае нош капчи мылкыдын пальышаз, ма серем ни, пе, мунёосты но мунё тусьты-пуньыосты возьыны та коркан.

Нош анае мунёосты ӧз лэзь куштыны, угось Панни мунё куке но солэн вылэм, футболэн шудонэз гинэ куштӥз. Эх, жаль, со футбол атаелэн ӧй вал, солэн шудонъёсыз чик но кыллилямтэ.

Али атае мыным выль футбол лэсьтӥз ни, таиз вужезлэсь но ява бадӟымгес. Мон нош кырӟан урокъя кык «витен» бертӥ ни доре, угось кырӟан уроклы  трос инты кулэ ӧвӧл.

****

Атае огпол шуиз, бадӟым ни, пе, тон, пие, соин ик нуназе бере Пачитачи пунымес тебере тон поттылод калгыны.

Зэм, мон бадӟым ни, соин ик куинь пол пунымес калгыны нуллӥ ик, нош ньылетӥяз Аттила эше лыктӥз. Со чик но ӧз вожъяськы мыным Пачитачиен калгын потамелы, соин ик шудонлудэ лейканы кошкиз. Соку мон но малпай, Пачитачимы бадӟым ни, пӧй, огназ но быгатоз калгыны, соин ки мон но лейканы дыртӥ.

Лейкаса-мараса, мон пунымес шуласа ӧтьыны кутски. Нош шудон куспам кин ке но куанерез лушкам, луоз, угось шуласа но ӧз ву дорам. Тини соку бӧрдонэ пызйиз, угось та дырозь одӥг корка усьтон гинэ вылам оскылӥзы, нош али Пачитачи ӧз ке берытскы, шуозы, ӧд эскеры, мар тонэн вераськонэз на. 

Бори агае пунымес шедьтэм. Соку мон зар! бордӥ, угось агае вылэ монэ оскизы вал, сое монэ возьманы косӥзы вал... нош солэн эктон программаез бырем, лэся.

Бориен ӵош котыр эскерим садэз, шуласа бызьылӥм. Пачитачи интые нош атаймес адӟим, милемды утчаса ветлэ вылэм ни, угось ми со вылэ оскемынэсь вал. Мукетъяз тань ачим ик бадӟым карисько ни: асме гинэ эскеро, угось, шӧдске, таиз капчигес.