вторник, 20 марта 2012 г.

Нылпи дунне


 Эва  Яниковски
Монэн мар ке со но луэ


(книгаысь люкетъёс)

Нырысетӥ нуналаз ик школае ветлоно кулэ вылымтэ, мыноно гинэ. Ма мон огнам но быгатысал, озьы ке но, ваньзы ик  сьӧрам лыктӥзы, монэ келяса. Школа азбарын мынам самой умой интые вал, нырысетӥ чурын ик пуки, ма со понна билет но басьтоно ӧз лу. Нырысетӥ чурын пукыса, ваньзэ адӟыны луэ вылэм: кырӟамзэс но, вераськемзэс но, ма школа кивалтӥсьлэсь вераськемзэ но.
Одӥг-ог гинэ мышлань берытсконо луи, бадӟым пиналъёслэсь вераськемзэс кылон понна.
Нош адӟе вал, макем школаен кивалтӥсь шумпотӥз милемлы, нырысетӥ классэ лыктӥсьёслы, паймод но бырод, ява, собере ватсаз на, берло, пе, тӥ но тодон-валан изкарез вормыса басьтоды ай.
Эх, малы меда та кивалтӥсь агай азьло верамтэ, сокем милемды возьма шуыса, угось гужем мынам сомында дыры вал, та школаязы мон азьлогес ик лыктысал ай. 
Кивалтӥсь агай шоры туж сак учкыса но, мон ӧй адӟы, ку дышетскон ар усьтӥськиз. Нош со вераз вал, тани али дышетскон арез усьтӥсько шуыса.
Шулдыръяськон бере та нуналэ ик милемлы трос карандаш но пӧртэм буёло кагаз кузьмазы, а со борды нош эшшо ке дышетӥсь апай шедиз на. Тани мар со ивортӥз: мон, пе, кыкетӥ анайды луо.
Мон кышкатски, ма тае кылыса анае чик но уз шумпоты, уго табере кык кузя луозы ни. Нош анае шӧдтэк шорысь пальпотӥз, огнам, пе, сёровно тон сьӧры эскериськыны уг вуттӥськы.
****
Дорамы кин ке куное лыктэ ке, соку анае кофе позьтэ, висъетмылэсь ӧссэ ворса, угось умойгес луоз, отчы ӧд ке учкы.
Но жаляса верано, дышетӥсе анаелы азьлогес поттылэм ни вылэм, со шоры, пе, куно шоры кадь эн учке, мон, пе, семьяеныды гинэ тодматско.
Соин ик анае вань ӧсъёсты миськиз, вань вылдӥсьмес но пыдкутчанмес пыроназе лад-лад тыриз. Атае нош креслолэсь куксэ лякыны дыр но шедьтӥз, люстрае кык лампочка но понӥз.
Бори агае борддоръёсысь вань постеръёссэ октӥз, мон со куспын бичам каштанъёсме балконэ поттӥ. Кыӵе нош чалмыт-шыпыт луиз улонниямы, ноку таӵеез адӟем но кылэм но ӧй вал на! Тини соку Пачитачи пунымес но бускельёсмы доры поттӥмы, угось со уг на тоды, дышетӥсе куно ӧвӧл, соин ик, кутскоз но пыдкутчанзэ но йыръёз я мар, кызьы мукет куноосмылэсь каре.
Дышетӥсе ӝыны час гинэ пукиз дорамы, озьы ке но семьяенымы пыр-поч тодматскыны удалтӥз: угось со куспын Эрдысь Банди агай семьяеныз вуиз, уламы улӥсьёс черекъяны кутскизы, балконысьтыды, пе, вань каштанъёсты ми доры усьыло-погыльско, бускельёсмы нош пунымес берлань дорамы ваизы, угось мискинь ӧз тод, мурт сиськонниын чылкыт луыны кулэ шуыса.
Мон чик но ӧй куректы та пумысен, ӵок, дышетӥсе табере адӟиз, ми туж шулдыр улӥськом дорын шуыса.
*****
Мон вордӥськем нуналам гинэ будӥсько, угось ӵапак соку атае монэ мерта. Туэ нош рекорд пуктӥ: пыдкутчан сяна, штаниос но кузьгес басьтоно луиз. Ма сыӵе ик кузь кулэ но ӧй вал, кыӵе магазинын кадь.
Апай нош, кудӥз вузаськонниын ужа, индылӥз: ма ӵок, пе, сёровно джинс штани миськыку пуксе, пияшъёс нош сыӵе ӝог будо, кин ке соосты нюлтыса возе кадь. Тинь озьы ӝоген, пе, штаниеныд эшъяськод ай.

Вордиськем нуналам ӵужае туп кузьмаз, кудиныз урамын гинэ луэ шудыны, агаелэсь нош майталву-пеллян шедиз ай та, таиныз но балконын гинэ, пе, луэ пелляны, Банди агае нош ымын шудон гармоника кузьмаз, кудӥныз корка пушкын гинэ, пе, шудоно. Мон ваньзэ тае нырысь-валысь ӧй тод, бускель апай куаретэмысь гинэ валай: балконын крезьгурамдэ ноку но, пе, медам кыл ни.
Гармоникаеным дышетскыны кутскыса, анайёсы монэ весяк ураме тупен шудыны улляло, яке куарето, малы, пе, Аттила эшед доры уд ветлӥськы, сыӵе матын улыса но. Мон шумпотыса урамын шудысал, Аттила доры но мынысал, нош гуртын дыръям ялан гармоникаеным шудӥсько. Кылӥ вал уго, кызьы ке но ӝыт атае анаелы шуиз, эн алы, пе, мед шудоз, ӝоген акыльтоз ай солы. Мынам нош уг поты адӟеме, кызьы анай-атае нош ик йырзэс сэзьяса лулӟыло но шуо, токма гинэ, пие, та гармоника кузьымед, таиныз но чиданэд уг тырмы шудыны.
****
Бори агае огпол математикаен «куинь» бысьтыса вуиз гуртэ. Ма озьы ини со, шуэ, дорын инты ӧвӧл, уг лу татын лач-лач дышетскыны.
Мон но соглаш, ми дорын чик но инты ӧвӧл, уг лу пыр-поч дышетскыны. Ма басьтысал-а мон но «куинь» гожъяськонэн?
Талы пумит атае тани мар вазиз: интылы луыса гинэ ке, пе, «куинь» ворттӥськоды гуртэ, тань юрттоз со милемлы, висъетысьтымы вань кулэтэм арбериосмес куялоз, соку тӥни интымы но луоз, «куинь» но уз ву ни.
Мон нош атае пумит вази, нырысь ик, пӧй, Борилэсь со вань постеръёссэ куштом. Бори нош пумитам, ма кызьы, пе, сотэк! Нош азьло тынэсьтыд, пе, каштанъёстэ но спичка коробкаостэ сэрпалляно.
Анае нош атаелы шуиз, шудон машинаос но, пе, токма гинэ кыллё ни, бирдыфутбол но туж трос инты басьтэ.
Атае нош капчи мылкыдын пальышаз, ма серем ни, пе, мунёосты но мунё тусьты-пуньыосты возьыны та коркан.
Нош анае мунёосты ӧз лэзь куштыны, угось Панни мунё куке но солэн вылэм, футболэн шудонэз гинэ куштӥз. Эх, жаль, со футбол атаелэн ӧй вал, солэн шудонъёсыз чик но кыллилямтэ.
Али атае мыным выль футбол лэсьтӥз ни, таиз вужезлэсь но ява бадӟымгес. Мон нош кырӟан урокъя кык «витен» бертӥ ни доре, угось кырӟан уроклы  трос инты кулэ ӧвӧл.
****
Атае огпол шуиз, бадӟым ни, пе, тон, пие, соин ик нуназе бере Пачитачи пунымес тебере тон поттылод калгыны.
Зэм, мон бадӟым ни, соин ик куинь пол пунымес калгыны нуллӥ ик, нош ньылетӥяз Аттила эше лыктӥз. Со чик но ӧз вожъяськы мыным Пачитачиен калгын потамелы, соин ик шудонлудэ лейканы кошкиз. Соку мон но малпай, Пачитачимы бадӟым ни, пӧй, огназ но быгатоз калгыны, соин ки мон но лейканы дыртӥ.
Лейкаса-мараса, мон пунымес шуласа ӧтьыны кутски. Нош шудон куспам кин ке но куанерез лушкам, луоз, угось шуласа но ӧз ву дорам. Тини соку бӧрдонэ пызйиз, угось та дырозь одӥг корка усьтон гинэ вылам оскылӥзы, нош али Пачитачи ӧз ке берытскы, шуозы, ӧд эскеры, мар тонэн вераськонэз на. 
Бори агае пунымес шедьтэм. Соку мон зар! бордӥ, угось агае вылэ монэ оскизы вал, сое монэ возьманы косӥзы вал... нош солэн эктон программаез бырем, лэся.
Бориен ӵош котыр эскерим садэз, шуласа бызьылӥм. Пачитачи интые нош атаймес адӟим, милемды утчаса ветлэ вылэм ни, угось ми со вылэ оскемынэсь вал. Мукетъяз тань ачим ик бадӟым карисько ни: асме гинэ эскеро, угось, шӧдске, таиз капчигес.

пятница, 19 августа 2011 г.

Выжыкыл дуннеын (5)


Эшъёс ке вань....

Туннэ пичи Олилы атаез мунё басьтэм. Верантэм шумпотэ нылаш, выль шудонзэ киысьтыз но уг куя. Нош кыӵе чебер со! Лыз синъёсыз быльк! гинэ кузёез шоры учко, льӧль пичи ымдураз серектон «кугӟам». Чебер кузь йырсиез лемлет пунэтэн пунэмын, пӧртэм буёло дэремез гинэ но синэз кыске: чылкак улэп мурт кадь! Оли мунёезлэн я йырсияз йӧтске, я мунёезлэсь дэремзэ маялля, осконтэм, лэся, потэ.
Тани нылаш мунёзэ кутыса ураме потӥз. Отын эшъёсыз шудо вал. Олиез адӟыса, нылъёс сое котыртӥзы. Котькудӥзлэн адӟемез, учкемез потӥз мунёез. Оли нош шудонзэ ал вылаз пуктӥз, эшъёсызлы вераз кадь: «Учкелэ, кыӵе мынам мунёе, тӥляд таӵеез ӧвӧл». Мунёзэ эшъёсызлы ӧз сётъя, шудонзэ бордаз ӝиптыса шуылӥз:
- Чебер дэремзэ нашталоды, пыдзэ чигтыны шедьтоды.....
Эшъёсыз Олилэсь палэнскизы, асьсэ понна шудыны кутскизы. Оли ӧжыт калгиз на урамтӥ но гуртаз пыриз. Мунёеныз коркан гинэ шудылӥз, кышказ, лэся, таламзылэсь.
Ӵуказеяз нош мӧзмыт но чалмыт луиз нылашлы огназ. Мунёзэ кутӥз вал но, берен интыяз понӥз. Кема учкиз Оли укное. Тӥни эшъёсыз шудо, тэтчало, куспазы шулдыр серекъяло. Нош Оли огназ, серекъяны, вераськыны нокинэн. Ӧз чида ни пинал сюлэм, мунёзэ кутыса ураме лобиз.
Нылъёс Олиез адӟизы ке но, ӧз куаретэ. Соку Оли палэнысен шыпытак гинэ вазиз:
- Ойдолэ, нылъёс, ӵош шудомы.
Эшъёсыз куспазы лушкем кенешизы но, пӧлазы ӧтизы. Табере ӧз ват ни мунёзэ Оли, ваньмыныз ӵош шудӥзы. Валаз, лэся, ӵошен шулдыргес шуыса.
Ӧз но шӧдэ пиналъёс, кызьы нунал ортчиз, ӝыт вуиз. Жадем, лэся, ныл шудыса, валес вылысен мунёзэ бордаз ӝиптӥз но шуиз:
- Эшъёс ке вань.....
Ӧз быдты ни веранзэ, чаляк умме усиз.

понедельник, 20 июня 2011 г.

Выжыкыл дуннеын (4)


Джанни Родари

Кынтэм дворец

(итальян кылысь берыктэм выжыкыл

Огпол Болонья[1] карлэн бадӟым карлудаз[2] кынтэмлэсь[3] дворец пуктӥллям. Быдэс карысь нылпиос таре  татчы ветлыны кутскиллям, нуналаз кӧня ке коть кынтэм сиыны шуыса. Дворецлэн липетэз йӧлвыллэсь, ӵынпотон трубаосыз нош чечым ваталэсь но цукатлэсь вылӥллям. Нош кылемез ваньмыз кынтэмлэсь: ӧсъёсыз но кынтэмлэсь, борддоръёсыз но кынтэмлэсь, коркапуш тӥрлыкез но кынтэмлэсь вылэм.
Тани огнуналэ одӥг пичи пияш ческыт ӝӧк борды ӝабырскиз, ӝӧккукъёсты бӧрсьысь бӧрсе нюлыны ӧдъяз: ӝӧкез вылаз сылӥсь тусьтыосыныз валче куашкатозяз нюлӥз. Тусьтыос нош шоколад кынтэмлэсь вылӥллям, дунне вылысь самой умой шоколадлэсь.
Дворецез эскерисьёс шӧдтэк шорысь синйылтӥзы, одӥгез укно чылкак шунам ни шуыса. Укно пиялаос уго узы кынтэмлэсь вылӥллям, соин ик шунаса пичи горд буёло шуръёслы пӧрмыны кутскиллям ни.
Ӝоггес татчы, – кеськиз огез эскерись. – Ӝоггес-ӝоггес! Дыртэ!
Вань нылпиос укноос пала кариськизы, одӥг шапыкез но, пе, та паймоно коркалэн медам быры-ышы.
– Пукон! – вань сюлмысь куриз пересь, угось калык мышкысь дворец пала матэктыны ӧз быгаты. – Одӥг пукон пересь адямилы. Кин мыным сое ваёз? Юрттэ! Кио пукон вае мыным, вань ке.
Соку одӥгез тылпу утись бызьыса ик кремлэсь но фисташкаослэсь кынтэм кресло ваиз, куанер пересь соку ик пуконлэсь киоссэ нюлыны кутскиз.
Та зэмзэ но бадӟым нунал вал та карын, эмъясьёслэн куремзя та нуналэ нокинлэн кӧтыз но, ява, ӧз висьы.
Нош али, нылпиос кыкетӥ кынтэм ке куро на, анай-атайзы соку ик шуо:
–Тыныд Болонья карын кадь кынтэмлэсь пуктэм дворец кулэ басьтыны.


[1] Болонья – Италиысь кар
[2] Карлуд – площадь
[3] кынтэм – мороженое