Нылпи сад: июня 2011

понедельник, 20 июня 2011 г.

Выжыкыл дуннеын (4)

Джанни Родари

Кынтэм дворец

(итальян кылысь берыктэм выжыкыл)

Огпол Болонья[1] карлэн бадӟым карлудаз[2] кынтэмлэсь[3] дворец пуктӥллям. Быдэс карысь нылпиос таре татчы ветлыны кутскиллям, нуналаз кӧня ке коть кынтэм сиыны шуыса. Дворецлэн липетэз йӧлвыллэсь, ӵынпотон трубаосыз нош чечым ваталэсь но цукатлэсь вылӥллям. Нош кылемез ваньмыз кынтэмлэсь: ӧсъёсыз но кынтэмлэсь, борддоръёсыз но кынтэмлэсь, коркапуш тӥрлыкез но кынтэмлэсь вылэм.

Тани огнуналэ одӥг пичи пияш ческыт ӝӧк борды ӝабырскиз, ӝӧккукъёсты бӧрсьысь бӧрсе нюлыны ӧдъяз: ӝӧкез вылаз сылӥсь тусьтыосыныз валче куашкатозяз нюлӥз. Тусьтыос нош шоколад кынтэмлэсь вылӥллям, дунне вылысь самой умой шоколадлэсь.

Дворецез эскерисьёс шӧдтэк шорысь синйылтӥзы, одӥгез укно чылкак шунам ни шуыса. Укно пиялаос уго узы кынтэмлэсь вылӥллям, соин ик шунаса пичи горд буёло шуръёслы пӧрмыны кутскиллям ни.

– Ӝоггес татчы, – кеськиз огез эскерись. – Ӝоггес-ӝоггес! Дыртэ!

Вань нылпиос укноос пала кариськизы, одӥг шапыкез но, пе, та паймоно коркалэн медам быры-ышы.

– Пукон! – вань сюлмысь куриз пересь, угось калык мышкысь дворец пала матэктыны ӧз быгаты. – Одӥг пукон пересь адямилы. Кин мыным сое ваёз? Юрттэ! Кио пукон вае мыным, вань ке.

Соку одӥгез тылпу утись бызьыса ик кремлэсь но фисташкаослэсь кынтэм кресло ваиз, куанер пересь соку ик пуконлэсь киоссэ нюлыны кутскиз.

Та зэмзэ но бадӟым нунал вал та карын, эмъясьёслэн куремзя та нуналэ нокинлэн кӧтыз но, ява, ӧз висьы.

Нош али, нылпиос кыкетӥ кынтэм ке куро на, анай-атайзы соку ик шуо:

–Тыныд Болонья карын кадь кынтэмлэсь пуктэм дворец кулэ басьтыны.

[1] Болонья – Италиысь кар

[2] Карлуд – площадь

[3] кынтэм – мороженое

пятница, 17 июня 2011 г.

Выжыкыл дуннеын (3)

Эрвин Лазар

Пась пыдвыл

(венгер кылысь берыктэм выжыкыл)

Улӥз-вылӥз пыдвыл. Куке но со дуно басмалэсь вуремын вал, задор лыз пужыосын чеберъямын вал. Табере нош пересьмиз но пась луиз. Нокинлы кулэ луымтэысь, сое куашканы кутскем ӝажы вылэ, кырсь-тузон пӧлы сэрпалтӥзы. Пыдвыл ӝожомиз, нош мугорысьтыз пась вылтӥяськыны ӧдъяз.

- Мон тынэсьтыд но чебергес, - шуиз со одӥг пол пыдвыллы.

- Мар? – паймиз пыдвыл. – Тон мынэсьтым чебергес?! Маиныд меда?

- Мон пыртӥ быдэс дунне адӟиське, - азьланьтӥз пась.

- Шонер, адӟиське, - соглаш луиз пыдвыл. – Озьы ке но, мынам чеберлыке пасьтэме бордын. Учкы ай лыз пужыосы шоры! Кыӵе яркытэсь соос!

- Мон ваньзэ вераса ӧй быдты на! Тон укыр кырсь. Пужыосыд но бездэмын ини, - пыдвыллэсь верамзэ пумозяз кылзытэк ик вормытъяське пась. – Нош мон ноку но уг но курмы, уг но безды.

Таӵе ултӥямез кылзыса, пыдвыл мур малпаськонэ усиз.

- Шонер верай-а? – уката но лоптӥз пась.

Озьы верамез бере, пась эшшо но бадӟымгес луиз. Нош пыдвыл векчи юдэсъёслы пӧрмиз. Табере пась паськытгес луиз пыдвыллэн кылем-мылемезлэсь но.

- Тон монэ чылкак быдтӥд! – ляб куараен вазиз на пыдвыл.

- Шумпот, мон кадь чебер пасен улыны луонлыкед вань шуыса, - нош ик йӧнъяськиз пась. Ачиз нош уката но зӧкомиз.

- Ой, тон монэ... – берпумзэ сипыртӥз пыдвыл.

Нош пась, бадӟымъяськеменыз, будӥз-будӥз но – кызьы пыдвыллэсь номыр ӧз кыльы ни, озьы ик ачиз но омыре сылмиз.

Выжыкыл дуннеын (2)

Ваёбыж тодматскиз гужемен

Ӵукна. Котыр чал-чал. Шунды-мемей, али иземысь султыса, сиосыныз шудэ ни. Писпуос котыре но вуэ, будосъёслы но шунытсэ вуттэ... Нош кин ай со лыктэ нюлэс палась? Дыртэ, лэся, бурдъёсыныз ӵем-ӵем лопыръя. Шунды тодмаз эшсэ, ваёбыж вылэм со. Тылобурдо небыт вазиз:

- ӟеч-а бур-а кӧлӥд, дуно эше? Выль нуналэд мед ваёз шуд, ужед мед удалтоз.

- Тау, ваёбыж, бадӟым тау. Аслыд но сое ик сӥзисько. Кытысь-о бен сыӵе вазь вуиськод? – пумитаз вазиз шунды.

- Туннэ вазьгес султӥ. Нюлэскы но вуылӥ, тонэ но ӟечкыланы вутски. Нош али гуртэ дыртӥсько, пиме дышетоно.

Берпум кылъёссэ вераса, ваёбыж гурт палаз лобӟиз.

Гуртэ но вуттэм ни сиоссэ шунды-мемей. Тылобурдоос гурзэс мытӥллям ни. Пуныос но ог-огзылы куарето. Тани гуртысь пудоос но возь вылэ потыны дасясько, быдэс гуртэ куаразэс вӧлмыто.

Ваёбыж, эшъёсыныз ӟечбуръяськыса, карез пала дыртӥз. Ваёбыж-анай пиез шоры лачмыт гинэ вазиз:

- Пие, султы ни. Ужмы трос али. Улосэз котыръяно, улонэз тыныд возьмато но валэкто.

Чирик сое гинэ, лэся, вите вылэм, анаезлэсь мусо куаразэ кылыса, чорк! султӥз ни:

- Мон дась ини, анай.

- Дась ке, туж умо. Ойдо бен кутском.

Нырысь ик ваёбыж-анай валэктӥз, мар со гужем, солэсь чеберзэ валаны дышетӥз.

- Гужем, пие, со ӵыдонтэм вакыт. Котырак вожектэ, сяськаяське. Нуналъёс но туж кузесь но шулдыресь. Зоръёс но луыло, угось будосъёслы но асьмелы зортэк улыны секыт луысал. Ойдо али возь вылэ лобом, гужемез отысь но эскером.

Возь вылэ вуыса, анай пиезлы номыр ӧз мадь ни, учкыса, пе, ачид валалод гужемлэсь чеберзэ. Возь выл нош ӵуж, льӧль, лыз тылъёсын кадь ворекъя. Лыдъянтэм трос сяськаос: ненегесь, мусоесь, чебересь. Вылазы нош мушъёс гурето, бубылиос лобало, бубылиос но сяська кадесь адӟисько. Шуак инбам гудыртӥз. Чирик кышкатскиз ке но, анаез валэктӥз:

- Эн кышка, пие. Тазьы зорыны кутске. Нош али умой учкы, будосъёсты эскеры.

Тани зорыны но кутскиз. Будосъёс шумпотӥзы, лэся, йыръёссэс мыкырто но ӝуто, куаръёсынызы мальдыто. Пичи ваёбыжлы сяськаос экто кадь потӥз.

Но тани каллен но каллен усьыны кутскизы зор шапыкъёс, кӧня ке дыр ортчыса, воксё но зоремысь дугдӥз. Пилемъёс пӧлысь пальпотыса шунды-мемей потӥз. Котырак чиль-дол кисьтаське, турын-куар уката но вожектэ, быдэс возьвыл пальпотэ.

Анай но пиез шоры учкыса вазиз:

- Я, пие, туннэ тырмоз, дышетсконмес ӵуказе нош азьланьтом.

Пичи тылобурдо соглаш луиз. Гуртазы вуытозязы, анаезлы выльысь но выльысь адӟемзэ мадьылӥз. Табере та ненег но пичи улон но валаз гужемлэсь чеберзэ.

Тӥ но, пиналъёс, ветлылэ возь вылэ, учкылэ инкуазьмес, котькуд нунал мар ке но выльзэ адӟоды, шедьтоды. Бордӥсез дугдоз, лекез пальпотоз, соку улонмы но шулдырскоз.

Шаркан палъёс

среда, 15 июня 2011 г.

Котькуд нунал - выль шудон

Шедьтэ туспуктэмъёсын возьматэм кылъёсты:

А Т О Г З Д Е Ӝ

П Р К П И Ц Ц А

Л Е Ф Я Й К Ч И

В Ш Л Ь В Т Е К

С Н Е Ь Н Х Ч Ь

Ӥ Л Б Д Н Я Ы О

Л Ӵ А У З Я Ф Э

Ь ӟ А З Е Г Н Ю

Л Ш Д О А Э П Ь

1.


2.


4.

Котькуд нунал - выль выжыкыл

              Ӵушъял но ӟичы

   Азьло ӵушъялъёс веньтэм вылӥллям, гольык шырпиос кадесь. Соос ялан кышкаса улӥллям, кин ке уз куты-а шуыса.

Одӥг пол, шулдыр гужем нуналэ, Ӵушъял губияны потӥз. Эскериськыса мынэ, кин ке сьӧраз уг вамышъя-а шуыса. Тани губиё интыез шедьтӥз. Гань-гань кариськыса бичаськыны кутскиз. Ӵап со вакытэ ӟичы сиён утчаны потэм. Ӵушъялэз адзыса, соку ик кыз сьӧры ватскиз, ачиз малпа ни: "Туннэлы ческыт сиён шедиз ай!" Ӵушъял нош кудызэ тырмытӥз но гуртаз бертыны потӥз. Нош ӟичы сое гинэ витем. Тэтчиз ук Ӵушъял вылэ! Соиз олокызьы гинэ палэнскыны вуттӥз на. Кышкаеменыз губиен кудызэ ик уськытӥз, кызъёс улэ питраса пегӟе ни та. ӟичылэн кӧттыр сиёнзэ лэземез уг поты, уиськыса сьӧраз бызе ук, бызе... Нош Ӵушъял тюак! кыз улэ пыриз, отын карез вал, лэся. ӟичы, мар карыны ёрмыса, кыз улэ ик шутэтскыны интыяськиз.

Ӵушъял нош, караз пырыса, сузяськытэк-маратэк (нош тыбыраз тач-тач! кыз лыс мертчылэмын вылэм) кӧлыны выдӥз. Нош ӵуказеяз ӵукна султӥз но, вылтыр ку-гонзэ сузяны кутскиз. Нош мар та таӵе? Кыз лысъёс бордаз лякиськиллям, кизэ вӧсь каро. Ӵушъял кема куректыса ӧз улы, асьсэос, пе, усьылозы ай, али нош сиськоно, кӧт сюма. Ӵушъял эскериськыса кыре потӥз: котыр нокин уг адӟиськы. Тӥни озьы сиён сярысь малпаськыса вамышъякуз, бертӥз сое кин ке бац! гинэ кырмиз но... соку ик лэзиз. ӟичы чир! кесяськыса, пыдъёссэ нюлыны кутскиз.

Мар луэм та ӟичылы?

Тӥ, пиналъёс, валады-а?

Мон нош валай!