Выжыкыл дуннеын (2)

Ваёбыж тодматскиз гужемен

Ӵукна. Котыр чал-чал. Шунды-мемей, али иземысь султыса, сиосыныз шудэ ни. Писпуос котыре но вуэ, будосъёслы но шунытсэ вуттэ... Нош кин ай со лыктэ нюлэс палась? Дыртэ, лэся, бурдъёсыныз ӵем-ӵем лопыръя. Шунды тодмаз эшсэ, ваёбыж вылэм со. Тылобурдо небыт вазиз:

- ӟеч-а бур-а кӧлӥд, дуно эше? Выль нуналэд мед ваёз шуд, ужед мед удалтоз.

- Тау, ваёбыж, бадӟым тау. Аслыд но сое ик сӥзисько. Кытысь-о бен сыӵе вазь вуиськод? – пумитаз вазиз шунды.

- Туннэ вазьгес султӥ. Нюлэскы но вуылӥ, тонэ но ӟечкыланы вутски. Нош али гуртэ дыртӥсько, пиме дышетоно.

Берпум кылъёссэ вераса, ваёбыж гурт палаз лобӟиз.

Гуртэ но вуттэм ни сиоссэ шунды-мемей. Тылобурдоос гурзэс мытӥллям ни. Пуныос но ог-огзылы куарето. Тани гуртысь пудоос но возь вылэ потыны дасясько, быдэс гуртэ куаразэс вӧлмыто.

Ваёбыж, эшъёсыныз ӟечбуръяськыса, карез пала дыртӥз. Ваёбыж-анай пиез шоры лачмыт гинэ вазиз:

- Пие, султы ни. Ужмы трос али. Улосэз котыръяно, улонэз тыныд возьмато но валэкто.

Чирик сое гинэ, лэся, вите вылэм, анаезлэсь мусо куаразэ кылыса, чорк! султӥз ни:

- Мон дась ини, анай.

- Дась ке, туж умо. Ойдо бен кутском.

Нырысь ик ваёбыж-анай валэктӥз, мар со гужем, солэсь чеберзэ валаны дышетӥз.

- Гужем, пие, со ӵыдонтэм вакыт. Котырак вожектэ, сяськаяське. Нуналъёс но туж кузесь но шулдыресь. Зоръёс но луыло, угось будосъёслы но асьмелы зортэк улыны секыт луысал. Ойдо али возь вылэ лобом, гужемез отысь но эскером.

Возь вылэ вуыса, анай пиезлы номыр ӧз мадь ни, учкыса, пе, ачид валалод гужемлэсь чеберзэ. Возь выл нош ӵуж, льӧль, лыз тылъёсын кадь ворекъя. Лыдъянтэм трос сяськаос: ненегесь, мусоесь, чебересь. Вылазы нош мушъёс гурето, бубылиос лобало, бубылиос но сяська кадесь адӟисько. Шуак инбам гудыртӥз. Чирик кышкатскиз ке но, анаез валэктӥз:

- Эн кышка, пие. Тазьы зорыны кутске. Нош али умой учкы, будосъёсты эскеры.

Тани зорыны но кутскиз. Будосъёс шумпотӥзы, лэся, йыръёссэс мыкырто но ӝуто, куаръёсынызы мальдыто. Пичи ваёбыжлы сяськаос экто кадь потӥз.

Но тани каллен но каллен усьыны кутскизы зор шапыкъёс, кӧня ке дыр ортчыса, воксё но зоремысь дугдӥз. Пилемъёс пӧлысь пальпотыса шунды-мемей потӥз. Котырак чиль-дол кисьтаське, турын-куар уката но вожектэ, быдэс возьвыл пальпотэ.

Анай но пиез шоры учкыса вазиз:

- Я, пие, туннэ тырмоз, дышетсконмес ӵуказе нош азьланьтом.

Пичи тылобурдо соглаш луиз. Гуртазы вуытозязы, анаезлы выльысь но выльысь адӟемзэ мадьылӥз. Табере та ненег но пичи улон но валаз гужемлэсь чеберзэ.

Тӥ но, пиналъёс, ветлылэ возь вылэ, учкылэ инкуазьмес, котькуд нунал мар ке но выльзэ адӟоды, шедьтоды. Бордӥсез дугдоз, лекез пальпотоз, соку улонмы но шулдырскоз.

Шаркан палъёс